本人本身為敏感肌人士，因而對護膚略有研究，
見好多朋友都唔係太了解敏感係咩一回事，所以特意講下，
但本人絕非咩專家，大家都可以參與下討論。
其實敏感主要係指皮膚對某些特定物質有刺激反應，
而對咩物質有反應係好個人嘅事，每個人都唔同。
天然物質絕對唔代表唔會敏感，就好似食物敏感咁，
有人對蛋、麥、蜜糖、蝦、蟹、果仁、牛奶敏感咁，
呢啲都係天然嘢，但都係有人會敏感。
所以用化妝品護膚品都係，如果用某啲嘢令自己敏感，就要了解成份，
記低係咩物質令自己敏感，從而避免。
不過酒精、香料就有比較大機會令人敏感，所以敏感肌人士就一定要避免。
基於以上所講嘅，就算全天然都有機會敏感，
除非佢係經過臨床測試(係最敏感嘅皮膚上做測試，而且結果係statistically significant），
被皮膚專科醫生認可，咁先可以話敏感肌都啱用。
而會導致敏感發生嘅另一主要原因係皮膚嚴重缺水。
呢個亦都係點解有啲人用頭幾次無事，但突然敏感，
又或者點解乾肌人士通常都會出現敏感嘅原因。
水對皮膚組織黎講係最重要嘅，要有健康既皮膚一定一定要夠水！（詳細可以Google)
如果唔夠水，皮膚嘅防禦能力會減弱，因此就會對外來物質產生更大嘅刺激反應。
所以平時可能對某些物質唔會有刺激反應，係缺水時就會好易有刺激反應。
有好多人敷泥mask或者深層清潔mask會好吉面就係因為皮膚唔夠水。
所以敷啲美白（美白成份通常都會較刺激）、深層清潔mask前，首要就係要補水先。
大家記住購物前要先了解產品成份，同埋切記一定要保持皮膚水份充足呀！
No comments:
Post a Comment