Monday, May 5, 2014
好物推介- Skin Food Black Sesame Hot Mask
Skin Food Black Sesame Hot Mask
曾幾何時skin food 都係香港hit 過，不過近幾年已經愈黎愈靜。
話說自己本身都好少用skin food 啲product, 只係之前去韓國旅行時循例去巡視業務，
買咗啲嘢，收到一啲送嘅samples, 不過一直放埋一邊無用到。
直到之前可能因為轉季，加上我成日失眠，有時會成晚眼光光，或者淨係瞓得幾個鐘，
於是攪到皮膚出暗粒，同埋皮膚唔吸收護膚品，再惡性循環令到皮膚焗到又出暗粒。
於是開始摷下屋企睇下有冇啲可以深層啲潔淨皮膚或去角質嘅東東用下。
就咁被我搵到呢個黑芝麻hot mask sample 出黎。
先聲明我嘅皮膚係屬於乾性及敏感型，面皮極薄，曾患玫瑰挫瘡，
所以好刺激或者磨沙產品就絕對唔用得。
同埋呢個產品適合我用未必代表適合你，始終大家膚質不同，
所以係呢度只係比大家一個參考，
尤其係同我一樣屬於乾肌同敏感型嘅朋友就可以考慮係唔係買返屋企試吓。
其實我一直相信皮膚有自己保護及平衡機制，唔應該過度清潔及去角質，
令皮膚變薄及過度暴露並接觸外界，所以我唔會過度清潔皮膚，
而使用去角質嘅產品亦唔可以好頻密，我只會係有需要嘅時候用，
例如生暗粒時，同埋一星期最多用一次。
講番skin food 呢個黑芝麻mask, 用佢時有黑芝麻嘅味道，
雖然我唔係特別鍾意黑芝麻但係都可以接受。同埋佢有黑芝麻嘅粒粒，
搽係塊面再按摩嘅時候呢啲粒粒會變幼，但係呢啲粒粒一啲都唔粗硬，
所以唔會對塊面做成好大刺激，反而係一個幾溫口嘅mask, 所以好適合敏感皮膚使用。
雖然佢話個面膜係塊面嘅時候係會發熱並將啲污穢帶出，但我自己就唔係好覺佢有發熱。
至於效果方面，我自己就覺得好明顯所以好中意！
敷完用清水過水時，好明顯feel到塊面滑左好多，
同埋啲暗粒都消失左好多，大概都退到八、九成！
所以我包sample未用完，都走咗去skin food 睇，諗住買返屋企。
點知一睇發現香港嘅價錢係韓國嘅一倍有多，於是就無買住，諗住再睇下邊度有得平啲買。
後來比我發現咗個卓悅賣得好平，只係$52！當然即刻走去入貨啦！
用法：洗完面之後，當塊面仲濕濕地，搽適當份量係塊面度，避開眼周，
打圈按摩大約三至五分鐘，然後用清水沖洗。
我的美白牙齒大作戰
雪白嘅牙齒誰人不愛？張開口時牙齒雪白整齊的確會加分。
我的美白牙齒大作戰係我十多歲時已開始，希望透過呢篇嘢俾大家多個參考。 先講講我牙齒本身的狀況。
我牙齒不算黃，以前很小嘅時候很懶，不願刷牙，每日只係早上刷1次（大家千萬千萬不要學）。
幸好，就算這麼不顧牙齒健康（已不單是美白問題），並未試過蛀牙。
之後大個啲，開始明白牙齒健康嘅重要，便除了早上刷牙，睡前亦會刷多次，
亦學會了用牙線，並定期去洗牙。
現在我的牙齒屬於敏感型牙齒，用不對牙膏或口腔產品會牙肉腫痛，
牙齒吃凍嘢會痛，而且我幾年前患上唇炎，嘴唇極之敏感（之後有機會再講關於唇炎的事）。
基本上我只用專為敏感牙齒而設的牙膏。
講開牙膏，我依家係一定唔會用黑人牙膏嘅，之前用親都會敏感。
而美白牙膏也不每隻都適合用，因凡帶美白成份的不多不少都會刺激，
所以我盡量都會挑較溫和的或者先作資料搜集及研究。 以前我試過好幾款美白牙齒的產品，全部都係萬寧有售。
最耐以前用過一隻ok work, 不過依家應該停產了，係好似舊式塗改液咁，
用掃將美白gel 塗係牙齒。呢隻嘅好處係可以將所有牙齒，包括後排及裏面嘅都美白，
唔好處係唔衛生，個掃同個瓶入面啲gel會被污染，而我最最最唔like係啲gel溝埋口水，
同你牙齒啲污積起緊化學作用個陣，會起泡同成個口都好似充滿黏液咁（諗起都核凸）。
後來我又試過一隻叫white T 嘅（無記錯應該係周汶錡代言過）。
佢係之前個隻既改良版，變成筆狀，筆頭同樣係掃，後面就扭啲gel係個掃到出黎。
佢個設計令到佢handy 咗，衛生咗啲啲（至少唔會污染埋其它gel)。
不過佢令我牙齒極度敏感，我用咗2次堅係頂唔順無再用，所以完全唔知佢美白效果。 我美白牙齒嘅作戰又點會停呢。我有諗過去做藍光，但價錢真係唔平，
而我啲牙又未黃到一定要俾咁多錢去整白。
好耐之前已經聽過crest 嘅美白好得，再加上我家姐幾年前結婚時用過，
效果的確係見得到幾明顯嘅。不過唔知點解一直無dick起心肝去買。
直到之前偶然跟一個在澳洲當牙醫嘅朋友聊起，我叫他介紹我美白牙齒產品，
他就推介crest給我。之後我上網睇資料，見好多外國女仔都話crest 好work,
甚至乎係牙醫介紹佢地用，於是我又燒著咗！
不過佢有好多種款式，適合唔同需要同牙齒嘅人，真係要揀啱先得。 我係萬寧買咗crest 好耐，一直都冇用，直到琴日終於開黎用。
我決定記錄低整個treatment 過程，再同大家分享，成個treatment 要20日，
到時我會再同大家報告佢嘅美白效果，同埋使用方法，以及需要注意的事項。
希望大家可以繼續留意。 以下係啲個人美白牙齒嘅貼士： 1. 至少每日刷牙2次（正確刷牙方法請自行上網睇資料或問牙醫） 2. 一定要用牙線（正確使用牙線方法請自行上網睇資料或問牙醫） 3. 一定要定期洗牙。洗牙目的不是美白牙齒，而係弄走牙石，這對牙齒外觀同樣重要） 4. 擁有雪白牙齒不等於擁有健康牙齒。請先看顧牙齒的健康才談美白。 5. 使用任何美白牙齒產品之前，請先了解產品，並對產品的效果持有合理期望。 6. 需知道牙齒本身不是純白色的，而是帶黃的，而且每個人牙齒本身的顏色都是有分別的。
美白產品只是將牙齒表面的污積去掉，若果你牙齒本身的顏色已經偏黃，
或者曾食某種抗生素或藥物令牙齒變黃，那大部分美白產品都不會有明顯效果。 7. 若果好似我咁喜歡飲奶茶、咖啡或茶，唔需要戒飲，不過盡可能係飲完後立即用清水漱口。
Liquid concealer 大比併！
1號佳麗有Revlon Age Defying concealer/ anticernes/ corrector 2號佳麗有 Maybelline Instant Age Rewind (eraser dark circles/ treatment concealer) 3號佳麗有 3CE Waterful Concealer 3枝色號均是最淺色的，1是01 light pale, 2 是light pale, 3 是#001 包裝/使用方便程度：1>3>2 1號用掃最方便亦最容易取適當份量；
3號用擠的，有時會擠得太多，要較小心；
2號用扭的，從海綿頭出，較不衛生，亦有浪費的情況，
因很多都會被海綿吸收了，而本人那枝更出現很難扭出的情況！
（扭十世才有丁點從海綿滲出，但扭管則"爆汁"!最後我把整個海綿除掉，方便超多！） 功能：2>1>3 2號「號稱」有Goji Berry 及haloxyl ，不單是concealer, 亦是treatment,
可即時減淡黑眼圈及細紋，並減少眼部浮腫。不過本人用完唔太覺有明顯效果。
1號則稱有「DNA advantage」，可幫助保護皮膚對抗衰老。
嗯，再一次唔知真定假，因為唔太覺。
3號無其它特別嘢係入面，只係concealer 1枝。 水潤度：3>1>2 個人覺得3號係無叫錯waterful嘅，因為真係好水，好易推，
用小小已經可以塗哂成個眼底，亦因為咁特別適合用在眼底，
唔會攪到有乾紋或者太乾太難推攪到太大力hurt到眼嘅皮膚。
1號都好水，只係無3號咁勁。
2號雖然講到明for 黑眼圈，又話減淡眼紋，
但其實本人覺得對我黎講係3款入面最唔水的，但唔代表佢乾，
只係我用完有時會"cake"粉，有眼紋（可能我太乾） 顏色： 1號最白，可以遮塊面，亦可當highlight。
2號有d黃，因為始終for 黑眼圈係要有橙色undertone 去做corrector,
但個人覺得有時塗完眼底好似灰咗d。
3號係3款中最橙嘅，雖然已經係最淺嘅色號，
亦因為咁用黎遮黑眼圈係超級一流，因為有橙tone 做corrector,
可以好自然咁遮到，又唔會白咗灰咗。 遮睱力： 其實好睇遮d咩，如果係講黑眼圈，個人最like 3號，
因為其水潤度及顏色偏橙係最合適遮黑眼圈嘅！
我有千年黑眼圈，一直用好多唔同方法同concealers去遮。
當我第1次用2號時我真心覺得係好用嘅，可以遮到7成，但用用下就覺得偏灰同乾。
到我用3號時，我覺得比2號好用好多！直頭係愛上了！
可以遮到8、9成，又自然又水！
至於1號我覺得唔單單用係眼底，可以用係成塊面，亦可當highlight(因為隻色係幾白嘅） 抵買度： 3款價錢差不多，容量上黎睇3號最多（10ml),
1號最小（5.3ml), 2號係中間（6ml) 。
另外3號每次用好小就得，所以都幾抵用。
Subscribe to:
Posts (Atom)